Transferlar oynasida "Real" faol bo'lmadi. APL klublari katta sahnada!

Yozgi transfer oynasida sarflangan mablag'lar bo'yicha klublar reytingi e'lon qilindi. Beshta klub joriy transfer oynasida tarkibni kuchaytirish uchun 100 million evrodan ortiq mablag' sarfladi.

"Bavariya", "Manchester Siti", "Barselona", "Tottenxem" va "Lids" bu borada super transferlarni amalga oshirdi.

50 million evroga etgan xaridlarni 21 ta klub, jumladan, Angliya premer-ligasining 12 nafar vakili amalga oshirdi. Bu ham albatta, Premer-liga darajasi oshganini ko'rsatadi.

Chempionlar ligasining amaldagi g'olibi - "Real" yozgi transfer oynasida eng ko'p pul sarflagan jamoalar orasida kuchli 10 talikda mavjud emas. "Real Madrid"ning xarajatlari 80 million evroni tashkil etadi, "qaymoqranglilar" 13-o'rinni band etishdi. Jamoa premer-ligaga yangi kelgan "Nottingem Forest"dan bir pog'ona ortda qolmoqda (81,75 million evro).

Quyida transferlar oynasida faol bo'lgan klublar haqida so'z yuritamiz.

10-o'rin. "Liverpul" - 85,8 million evro

«Liverpul» «Ayaks»dan bor-yo'g'i 200 ming evro kam sarflagan holda deyarli top 10 likka kirishni amalladi. "Qizillar"ning asosiy sarmoyasi Darvin Nunesga ketgan bo'lib, 75 million evro to'langan. Urugvaylik futbolchi haqidagi gap-so'zlar hamon OAVda keng ko'lamda aylanmoqda. Bir necha kun oldin hujumchi "Leyptsig"ga qarshi o'rtoqlik o'yinida poker qayd etdi.

9-o'rin. "Borussiya" (Dortmund) - 86 million evro

"Borussiya" Xolandni sotib yubordi, ammo yangi kelgan futbolchilar ham undan kam emas: Alle, Adeyemi, Shlotterbek, Zyule. Achinarlisi, Sebastyan yaqin orada maydonda ko'rinish bermaydi. Uning jarohati tiklanishiga bir necha hafta kerak bo'ladi.

8-o'rin. "Yuventus" - 89,5 million evro

"Yuventus" Federiko Kezani sotib olish bo'yicha uzoq yillik shartnomani ado etdi va Myunxenga etib kelgan de Ligt o'rniga "Torino"dan braziliyalik himoyachi Bremerni sotib oldi.

7-o'rin. “Chelsi” – 94,2 million evro

Bu summa Raxim Sterling va Kalidu Kulibalining to'lovlaridan iborat, biroq “Chelsi” “Sevilya” bilan Jyul Kundening transferi borasida kelishib olgan. Tovon puli 60 mln evroni tashkil qiladi. Shuning uchun shartnoma rasmiylashtirilgach, "Chelsi" ushbu reytingda ettinchi o'rindan birinchi o'ringa ko'tariladi. Dahshat!

6-o'rin. "Arsenal" - 97,06 mln evro

"Arsenal" uchun ancha qaynoq va ilhom baxsh etuvchi transfer yozi! "Kanonirlar" allaqachon Gabi Jezus, Fabio Vieyra va okean narigi tomonidan bir nechta yigitlar bilan shartnoma imzolashdi. «Manchester Siti»dan transferi allaqachon kelishib olingan Aleksandr Zinchenko esa alohida katta voqelik.

5-o'rin. "Tottenxem" - 101,9 million evro

Konte haqiqatan ham "Tottenxem"ni o'zgartira oldi, chunki yaqin vaqtgacha "shporlar" yillar davomida transfer bozoriga dadillik bilan kira olishmasdi, endi esa yangi kelganlar uchun yuz milliondan ortiq mablag' sarf etildi. "Everton"dan Risharlison eng qimmat (58 million evro) ga sotib olindi. Lekin Bissuma, Spens, Langle kabi futbolchilar ijaradan tarkibga qo'shildi va bundan tashqari bir qancha tajribali erkin agentlarni ham unutmaslik kerak.

4-o'rin. "Barselona" - 103 million evro

"Barselona"ning haligacha katta qarzlari mavjud. Ammo Joan Laporta hammasini hisobga olib qo'ygan, u aqlli transfer siyosatini amalga oshirish niyatida. Chunki bilasizki, Bartomeu davrida qanchadan qancha milliardlar besamar sarflab yuborildi. Ularning o'rnini to'ldirish uchun Joan ancha ter to'kishiga to'g'ri keladi. Kataloniyaliklar eng yorqin transfer siyosatini olib bormoqda: Levandovski, Rafinya, Kristensen, Kese. Va hali bu ro'yxat tugash niyatida emas!

3-o'rin. "Lids Yunayted" - 105,64 mln evro

O'tgan mavsum oxirida Premer-ligadan deyarli tushib ketish arafasida bo'lgan klubni bu pog'onada ko'rish ajablanarli hol bo'lishi turgan gap. "Lids" futbolchilar almashinuvi bo'yicha gigantlar qatoriga kirib oldi. Yangi kelganlar haqida gapiradigan bo'lsak, jamoa allaqachon besh futbolchi transferini hal qilib bo'lgan: Brenden Aaronson, Luis Sinisterra, Tayler Adams, Rasmus Kristensen va Mark Roka.

2-o'rin. “Manchester Siti” – 108,75 million evro

Angliyaning amaldagi chempioni hozircha ikki kuchli transferga ega - Erling Xoland va Kalvin Fillips. Shubhasiz, boshqa xaridlar ham e'tiborni tortadi. Ayni dam “shaharliklar” himoyaning chap qanotida Aleksandr Zinchenkoning o'rnini egallashi kutilgan Mark Kukurelya uchun “Brayton” bilan savdolashmoqda.

1 o'rin. “Bavariya” – 117,5 million evro

Odatda, "Bavariya" katta pullar evaziga transferlarni amalga oshirishni istamaydi, ammo bu yozda myunxenliklar o'z qoidalarini keskin tarzda buzmoqda. "Bavariya" shu paytgacha Evropada transferlar uchun eng ko'p pul sarflagan jamoaga aylandi. De Ligt, Mane va Gravenberxni sotib olgan "qizillar" yangi mavsumdan tarkibni EChL bosh sovriniga etarli darajada kuchytirish niyatida. "Yuventus"dan kelib qo'shilgan De Ligt klub tarixidagi ikkinchi eng qimmat transferga aylandi.