To'xtang, shoshilmay turing… Ronaldu, Ronaldu va yana Ronaldu...

Krishtianu Ronaldu EChL chorak finali doirasida «Ayaks»ga qarshi kechgan ilk o'yin­da turnirning to'purarlikka daxldor bir necha rekordini yangilagandi, lekin uning 700ta gol marrasiga etishiga hali bor.

Aniqroq aytsak, portugaliyalik yulduz butun faoliyati davomida hozirga qadar jami 682ta golga mualliflik qilgan. Gap shundaki, «Ayaks» bilan Amsterdamdagi uchrashuvdan so'ng ayrim OAVda Ronaldu faoliyatidagi 700-golini nishonlagani haqida ma'lumot berildi. Albatta, bu fenomenal natija hisoblanadi. Axir butun futbol tarixida rasmiy o'yinlarda 700ta gol marrasiga etish atigi 5 nafar buyuk to'purarga nasib etgan - Gerd Myuller (735ta), Ferents Pushkash (746ta), Pele (767ta), Romario (772ta) va Yozef Bitsan (805ta). Demak, Krishtianu yaqin orada superyubileyni nishonlab, benazir beshlikni oltilikka aylantirishi mumkin. 

Nega shoshilishdi?

Savol tug'iladi: Ronalduning 700ta gol marrasiga etgani haqidagi ma'lumot qaerdan olindi? Axir axborot-kommunikatsiya sohasi rivojlangan zamonda yashayapmiz va megayulduz statistikasi masalasida xato qilish aqlga sig'maydi. Ma'lum bo'lishicha, 700ta gol marrasi haqida bong urgan OAV vakillari Ronalduning «katta» va «kichik» gollarini qo'shib hisoblashgan. Aniqroq aytsak, ular «Yuventus» etakchisi tomonidan vaqtida Portugaliya yoshlar va olimpiya termalari safida urilgan gollarni ham umumiy hisobga qo'shishgan. Shu tariqa axborot olamida ang­lashilmovchilik yuzaga keldi. FIFA tamoyiliga ko'ra esa, futbolchining shaxsiy statistikasiga uning klublar miqyosidagi rasmiy turnirlar va terma jamoasi (rasmiy va FIFA ro'yxatiga olingan o'rtoqlik o'yinlari) safida urgan gollari kiritiladi.

Messidan «Qochib» ketish

Aslida portugaliyalik hisobida «atigi» 682ta gol mavjud. Tushunarliki, shuning o'zi ham ko'p, juda ko'p. Har holda, amaldagi futbolchilarga qarasak, hech kim Ronalduchalik ko'p gol quvonchini tuygan emas. Taqqoslash uchun albatta, Krishtianuning bosh raqobatchisi Lionel Messi statistikasiga qaraymiz. Argentinalik futbolchi shu kunga qadar 662ta goldan xirmon yasadi. Leo seshanba oqshomi «MYu»ga qarshi kechgan ChL bahsida «dubl»ga erishdi. Natijada Ronaldu - Messi qarama-qarshiligida farq birozgina qisqardi: portugal shovvozi endi 20ta gol ko'rinishida oldinda. Krishtianuning «Ayaks» bilan bahslarda ChLga daxldor qanday yuqori ko'rsatkichlarni zabt etganiga kelsak, ular 3ta:

- ChLda 126-golini urdi (rekord);

- ChL «pley-off» raundlarida 65-golini urdi (rekord);

- ChL chorak final raundida 25-golini urdi (rekord).

Xullas, «Yuventus» hujumchisi o'ziga tegishli 3ta rekordni yangiladi. Lekin u xotirjam bo'lolmaydi, baribir. Binobarin, poygada bosh ta'qibchisi - Leo Messining nafasini shundoq his qilib turibdi. Misol uchun, «Barsa» etakchisi joriy ChLda raqiblar darvozasini 10 marta nishonga olgan bo'lsa, Krish endi 6-golini rasmiylashtirdiyu, kurashdan chetga chiqdi. Qiziq, Ronalduga tegishli 3ta rekord ko'rsatkich bo'­yicha argentinalikning natijasi qanday? U hozircha rekorddan ancha orqada:

- ChLdagi umumiy gollari soni - 110ta;

- ChL «pley-off» raundlaridagi gollari soni - 44ta;

- ChL chorak final raundidagi gollari soni - 12ta.

KUBOK FAKTORI

Ronaldu «Ayaks» bilan o'yinlarda aynan kubok (olimpiya) tizimidagi bosqichlarda samarani oshira olishga qodirligini yana bir bora isbotladi. Bunga uning joriy ChLdagi statistikasi yaqqol misol: 6ta golidan atigi 1tasini guruh raundida urgan «Yuve» yulduzi 1|8 va 1|4 finallar doirasidagi 4ta o'yinda raqib jamoa­larni 5 bora jazoladi. Yana bir tomoni, Turin klubining «pley-off»-2019dagi barcha gollari aynan Ronaldu nomiga yozildi. Qiziq ma'lumot: Krishtia­nu ChLdagi debyut golini «Ayaks» bilan o'yin vaqtidan roppa-rosa 12 yil muqaddam aynan chorak final uchrashuvida nishonlagan edi. Aniqroq aytsak, u 2007 yilning 10 aprel kuni «Roma» darvozasiga to'p kiritgan. Umuman olganda, Ronaldu mavsum-2003|2004dan buyon o'z ja­moala­ri - «MYu», «Real» va «Yuventus»ning ChL «pley-off» bosqichlarida urgan jami gollaridan naq 43,9 foiziga mualliflik qilgani bilan maqtanishga haqli. Ha, u «hayot-mamot» olishuvlariga moslashgan chinakam jang­chi!