«Senda ham imkon bor» shiori ostida para-atletika bo'yicha O'zbekiston chempionati o'tkazildi

Xabar berganimizdek, kecha poytaxtimizda Tokio-2020 Paralimpiya o'yinlari sari “Senda ham imkon bor” shiori ostida para-atletika bo'yicha O'zbekiston chempionati start olgan edi. Mazkur musobaqa kelasi yili Tokioda bo'lib o'tadigan navbatdagi Paralimpiya o'yinlariga terma jamoa tarkibini shakllantirib olish, nomzodlarni saralash nuqtai nazaridan ahamiyatli edi. Shu bois ham unda Respublikamizning barcha viloyatlaridan kelgan para-atletlar o'z iqtidorlarini namoyish etishdi.

Ikki kun davom etgan bellashuvlar xalqaro para-atletika oilasiga mansub yo'nalishlarda o'tkazildi. Kutilganidek, musobaqada Husniddin Norbekov, Doniyor Soliev, Miran Saxatov, Aleksandr Svechnikov, Temur G'iyosov, Asila Mirzayorova, Safiya Burxanova, Natalya Semyonova kabi taniqli para-atletlarimiz o'z yo'nalishlarida tengsiz ekanliklarini yana bir bor namoyish qililar.

Ushbu musobaqa Prezidentimiz «Aholining ijtimoiy qatlami bandligini ta'minlashni rag'batlantirishning tashkiliy chora-tadbirlari to'g'risida»gi qarorining ijrosini ta'minlash maqsadida ham o'tkazilgan bo'lib, unda Respublikamizning turli viloyatlaridan yangi iqtidor egalari kashf qilindi. Ta'kidlash joiz, ular o'z natijalari bilan terma jamoaning asosiy tarkib vakillariga munosib raqobatchi bo'la olishlarini isbotlashdi. Musobaqa yakunida Farg'ona viloyati vakillari umumjamoa bo'yicha birinchi o'rinni qo'lga kiritishdi. Shuningdek, Toshkent shahri ikkinchi, Navoiy viloyati esa uchinchi o'rinni egalladi.

Musobaqaning tantanali yopilish marosimida O'zbekiston Milliy olimpiya qo'mitasi va O'zbekiston Paralimpiya assotsiatsiyasining mutasaddi rahbarlari ishtirok etishdi.