Hindistondagi futbol o'yinida muxlislar o'tirgan stadion tribunasi qulab tushdi. 200 ga yaqin kishi jarohatlangan (video)

Hindistondagi futbol o'yinida muxlislar o'tirgan stadion tribunasi qulab tushdi. Dastlabki ma'lumotlarga ko'ra, hodisa oqibatida 200 dan ortiq kishi jabrlangan.

The Sun nashrining yozishicha, hodisa 19 mart kuni Kerala shtatining Malappuram shahridagi stadionda yuz bergan. Vaqtinchalik inshoot o'yin boshlanishi arafasida odamlar bilan birga qulab tushgan. Kamida besh kishining jiddiy jarohat olgani aytilmoqda.

Tribuna qulagach, tomoshabinlar orasida vahima boshlangan. Tribuna bilan birga yoritish tizimi (projektor) moslamalari ham qulagan va odamlar ustiga tushgan. Bu uning atrofida uchqunlarning uchib chiqishiga sabab bo'ldi. Qarama-qarshi tarafdagi tribunalardagi odamlar jabrlanganlarga yordam berishga shoshilgan bo'lsa. ba'zilar imkon qadar tezroq stadionni tark etishga harakat qilgan.

Nashr ma'lumotlariga ko'ra, vaqtinchalik tribuna 3,5 ming tomoshabinga mo'ljallangan, biroq unga deyarli sakkiz ming kishi kirishiga ruxsat berilgan.

Manba: daryo.uz