Farg'onada «Baby league» musobaqasi o'tkazildi

O'zbekiston futbol assotsiatsiyasi tomonidan yurtimizda futbolni yanada ommaviylashtirish, yosh avlodni har tomonlama barkamol qilib tarbiyalash va sog'lom turmush tarzini targ'ib qilish, shuningdek,  istiqbolli yosh futbolchilarni keyinchalik professional tarzda tayyorlash hamda futbol bo'yicha milliy terma jamoalar va professional futbol klublari uchun munosib nomzodlarni etkazib berish uchun joylarda selektsiya ishlarini amalga oshirish yuzasidan bir qator chora-tadbirlar amalga oshirilmoqda. 

Xususan, O'zbekiston futbol assotsiatsiyasi huzuridagi hududiy bolalar-o'smirlar futbol akademiyalarining tarbiyalanuvchilari o'rtasida “Baby league” musobaqasi joriy etilgani haqida avval xabar berib o'tgandik. Bugungi kunga kelib, mazkur musobaqaning 3-bosqichi yakuniga etib bormoqda. 2019 yilning 5 aprel sanasida Farg'ona viloyati bolalar-o'smirlar futbol akademiyasining seletsioner murabbiylaridan tashkil topgan ishchi guruh Farg'ona viloyati Farg'ona tumanida 11-12 yoshdan iborat bo'lgan yosh bolajonlar o'rtasida “Baby league” musobaqasini o'tkazishdi.

Farg'ona viloyati bolalar-o'smirlar futbol akademiyasining seletsioner murabbiylari Farg'ona tumanidan o'tkazilgan “Baby league” musobaqasida jami 300 nafar yosh bolajonlar orasidan 40 nafar qobiliyatli futbolchilarni saralab olishdi.

Bugungi kunga kelib, O'zbekiston futbol assotsiatsiyasi huzuridagi hududiy bolalar-o'smirlar futbol akademiyalari tomonidan o'tkazilgan “Baby league” musobaqalarida jami bir yarim ming nafardan ortiq yoshlar ishtirok etishdi. 

“Baby league” musobaqasini o'tkazilishidan asosiy maqsad yoshlarni futbolga jalb etish hamda ular orasidan yosh iqtidor egalarini saralab olish va hududiy futbol akademiyalariga selektsiya qilishdan iboratdir.