Fernando Yerro: «G'ururimni hech kim tortib ololmaydi»

Fernando Yerro «Madrid»ning asosiy jamoasiga 1989 yilda qo'shilib, Kamachoning o'rnini egallagandi. U dastlab, jamoada atigi yangi o'yinchi edi, xolos, ammo yakunda «Real» afsonasiga aylandi: uch marta Chempionlar Ligasi, ikki bor qit'alararo kubok, beshta La Liga, bir martadan Ispaniya kubogi va Evropa Superkubogi hamda to'rtta Ispaniya Superkubogini qo'lga kiritdi. «Qaymoqranglilar» libosida o'tkazgan 14 yillik faoliyati mobaynida klub tarixidagi eng ko'p (601ta) o'yin o'tkazgan 5-futbolchiga aylandi. Bu borada faqat Raul, Kasilyas, Sanchis va Serxio Ramos undan o'zib ketishdi. Yerro shunchaki himoyachi emas, balki to'purar edi. Faoliyatini yarim himoyachi sifatida boshlagan bo'lsada, o'rni himoya markazida ekanligini tezda anglab etdi. Shunga qaramay, o'z hisobiga 127ta gol yozdirib qo'ydi. Bundan tashqari, u Ispaniya terma jamoasi safida 89ta rasmiy o'yin o'tkazgan. Zidan futbol tarixidagi eng chiroyli gollardan birini urgan kechada Chempionlar Ligasining 9-sovrinini qo'lga kiritgan futbolchi AS nashriga eksklyuziv intervyu berdi.

- «Real»da boshqa klublarda yo'q nima bor?

- Avvalo - tarix, u sotib bo'lmaydigan narsa. «Real» - dunyodagi eng muvaffaqiyatli va eng yaxshi munosabatga ega klub. Ikkinchidan, g'oliblik geni. To'g'ri, boshqa klublarda yaxshi o'yin, taktika ko'rish mumkindir, lekin «Madrid» uchun asosiysi - g'alaba qozonish! «Real» qanday g'alaba qozonadi? To'g'ri, ba'zida siz ham bilmaysiz, lekin unda klub gerbining talablari va ulug'vorligini oshiradigan o'sha gen bor. Bu sizga bolalikdan meros bo'lib o'tadi, ya'ni faxriylar shunga o'rgatishadi. Buni hozir ham ko'rib turibmiz. Bugun «Real» tarkibida siz dunyodagi eng muhim o'yinda g'alaba qozonasiz, keyingi mavsumda esa yana chempionlik uchun kurashasiz. Bu erda siz erishilgan natija bilan yashamaysiz. Kimga qarshi o'ynasang ham, ba'zida raqib sendan ustun ekanligini muqarrar his qilsang ham, «Madrid»da g'alaba qozonish mumkinligini his qilishadi va mazkur holatda shunday tuyg'uga egamisiz yoki yo'q, buning ahamiyati yo'q.

- «Real»da o'ynab, bosimga dosh berish qiyinmi?

- Shunday ajoyib jamoadoshlarim, futbolchilar bor ediki, hatto o'shalar ham ilgari ayni bosimga dosh bera olishmagan, ya'ni shunday kunlarni ham ko'rdim. «Real» g'alaba qozonish uchun o'ynaydi - bu klub mentalitetiga mos. «Qaymoqranglilar» qaerda o'ynashmasin, futbolchilari faqat g'alaba qozonaman, degan o'y bilan maydonga tushishadi. Eshiting, La Ligadagi debyut kunimda katta yoshli futbolchilar oldimga kelib: «Biz «Real»miz va hatto mavsumoldi o'yinlarida ham yutqazmaymiz», deyishdi. Men aytgan gen mana shu! Nafaqat «Madrid»dagi, balki boshqa klublar yoki mamlakatlardagi ko'plab jamoadoshlarim bilan gaplashgan bir mavzu bor: «Real» Chempionlar Ligasida shunchalik ko'p g'olib bo'ldi... Bu qanchalik mushkul! Masalan, «Yuventus» yoki «Valensiya»ga qarshi o'yinda biz favorit emasdik. «Real» deyarli barcha finallarda g'alaba qozongan. Hozirgi kunimizda buni ko'rib, shubhasiz, klub gerbini hurmat qilasiz.

- «Real»ning ahamiyatini yoshlarga tushuntirish qi­yinmi?

- Odatda, mushkul, lekin buni tushuntirib beradiganlar bor va albatta, tushunmaydiganlar ham topiladi. Raulga qarang, hech kim unga bu nimani anglatishini tushuntirmoqchi emasdi. Yoki Morentes, Gutini olaylik. Jamoaga kelgan inson bu erda nima borligini allaqachon anglab etgan bo'ladi. Shuning uchun aytamanki, ulkan iqtidorga ega jamoadoshlarim bor edi, lekin bunday talablarni qo'yishga kelganda, uddalay olmadilar. Ular bosimga bardosh berolmadilar. «Madrid»da mag'lubiyatga uchragan kun eng og'iri: klub hayratda, jamoatchilik fikri senga qarshi... Men klubda 14 yil umrimni o'tkazdim va har safar «qaymoqranglilar» yangi markaziy himoyachi bilan shartnoma imzolashni xohlayotgani haqida o'qirdim. Yana ikkita gol o'tkazib yuborsak, darhol boshqa markaziy himoyachilar nomzodi paydo bo'lardi. Buni qanday hal qilasiz? Sizda individuallik va o'zingizga ishonch bo'lishi kerak, aks holda, dosh berolmaysiz. Bundan tashqari, murabbiylar ham bor. Chempionlar Ligasida g'olib chiqqan barcha murabbiylarga qarang, ularning barchasi bir xil: o'ta vazmin va mashhurlikka qiziqmaydi. Migel Munos, Xaynkes, Zidan yoki Anchelotti... ular asosiy yulduz ular emas, balki maydondagilar ekanligini bilishadi. «Real»da g'alaba qozonsang - bu ajoyib, lekin yutqazsang, hammasi yomonlashadi, chunki «qirollik klubi» g'alaba qozonish uchun yaratilgan. Bu jamoada ko'plab futbolchilar o'ynashgan, ammo «Real»ning buyukligi hammasidan ustun bo'lgan.

- «Real» muxlislari klubdagilardan ham talabchanroqmi?

- Muxlislar g'alaba qozonishga o'rganib qolishgan, chunki ular ko'p marotaba «Bernabeu»da bo'lishgan, ko'p o'yinchilarni ko'rishgan, ko'plab sov-rinlarni nishonlashgan. Shuning uchun bu erda standartlar vujudga kelgan. Agar 9-raqamda to'p sursangiz, muxlislar sizdan doim haq so'rashadi, lekin albatta, yoshingiz o'tgani sari formangiz yomonlashadi, sermahsullik pasayadi - bu hammaga xos. Ammo muxlislar sizni eng yaxshi holatda ko'rishni xohlashadi va bu yaxshi, chunki ular harakatlaringizni eng yaxshi paytingizda ko'rishgan va buni ularga yana bera olishingizni bilishadi, aslida esa bu imkonsiz. Keyin vaqti kelib, kamroq o'ynashni va guruhda ko'proq ishlashni boshlaysiz. Qaysi «Real» futbolchisi buni boshdan kechirmagan? Yoshingiz ul-g'ayadi va o'rningizga boshqasini izlashga to'g'ri keladi - bu hayot qonuni. «Madrid»ga 1989 yilda kelganimda, kimdir ketishi kerak edi. Menga 5-raqamli shkafni berishdi, u erda esa oldin o'sha afsonaviy Kamacho joylashgandi. Men ketganimda esa bu joy Serxio Ramosga berildi. Shuning uchun klub yana g'alaba qozonish uchun sizdan o'zingizni qayta kashf qilishingizni talab qiladi. G'alaba, g'alaba va yana g'alaba... Bu «Real»da har soniyada miyangizga quyiladigan shiordir.

- «Bernabeu»ning o'ziga xos nimasidir bormi?

- Sadoqat. Mazkur stadiondada muxlislar 5:0 hisobidagi g'alabadan ko'ra, ko'proq «kambek»lardan xursand bo'lishadi, chunki sevimli jamoalari kurashini tomosha qilishdan zavqlanishadi. Va bu sodir bo'ladi, chunki tarixda bunday aql bovar qilmaydigan epizodlar ko'p kuzatilgan. Bu tuyg'uni tushuntirib berib bo'lmaydi. «Real»da ko'plab yulduzlar bor edi va ularning barchasini bir narsa - ishga 100 foiz fidoyilik birlashtirdi. Men g'oliblik mentaliteti haqida avval aytganlarimga qaytaman. «Madrid»dagilar o'zlariga «Ha, biz juda yaxshi o'ynadik, lekin g'alaba qozondikmi?», degan savol berishadi. Agar javob «yo'q» bo'lsa, odamlar uylariga norozi kayfiyatda qaytishadi. Barcha klublar ham g'alaba qozonishni xohlaydi, lekin «Bernabeu»da hammasi boshqacha.

MUHAMMADXON tayyorladi

Manba: interfutbol.uz