Siyosat sabab "Ayaks" klubi Rossiyada o'ynayotgan futbolchining transferidan voz kechishi mumkin

"Krasnodar" yarim himoyachisi Eduard Spertsyanning Niderlandiyaning "Ayaks" klubiga o'tishi xavf ostida, deb xabar bermoqda De Telegraaf nashri.

Manbaga ko'ra, amsterdamliklarning kuzatuv kengashi Spertsyanning transferiga to'sqinlik qilmoqchi, chunki “mavjud siyosiy vaziyatda Rossiya bilan muzokara olib borish axloqsizdir”.

O'z navbatida, "Ayaks" futbol bo'yicha direktori Sven Mislintat Spertsyanni sotib olish bo'yicha kelishuvni yakunlashni talab qilmoqda.

Joriy mavsumda 23 yoshli Eduard Spertsyan “Krasnodar” safida 4 ta o'yinda maydonga tushib, 1 ta gol urdi va 2 ta golli uzatmani amalga oshirdi. Transfermarkt portali futbolchining narxini 12 million evroga baholamoqda.