«Paxtakor» va «Bunyodkor» qatnashgan turnirda kutilmaganda «Odil juniors» g'olib bo'ldi
/ Kiritdi: BestMaster Ko'rilgan: 762
Joriy yil 19 mart kuni davlatimiz rahbari Shavkat Mirziyoev raisligida o'tkazilgan videoselektor yig'ilishida belgilab berilgan vazifalardan kelib chiqib, Toshkent viloyati Toshkent tumani hokimligi tomonidan hududda jismoniy tarbiya va sportni ommalashtirishga alohida ahamiyat qaratilmoqda. Jumladan, yaqinda tuman jismoniy tarbiya va sport bo'limi, bolalar-o'smirlar sport maktabi bilan hamkorlikda futbol musobaqasi tashkil etildi. Unda 2007 yilda tug'ilgan bolalar g'oliblik uchun bahs olib borishdi. Toshkent tumani hokimi kubogi uchun o'tkazilgan musobaqada “Bunyodkor”, “Paxtakor”, “Lokomotiv”, “Toshkent akademiya-2007”, “Odil juniors”, shuningdek, Toshkent tumani Keles shaharchasining BO'SM-1 va BO'SM-2 jamoalari ishtirok etdi. Hokim kubogi musobaqasi doirasida kontsert va shou dasturlar ham tashkil etildi. Xususan, yoshlarning sevimli xonandasi Farrux Komilov ishtirokida kontsert hamda taniqli so'z ustasi Valijon Shamshievlarning chiqishlari muxlislarda boy taassurot qoldirdi. 3 kun davom etgan musobaqa finaliga mezbon BO'SM-1 va kutilmaganda “Odil juniors” jamoalari etib keldi. Qizg'in va murosasiz kechgan o'yinning asosiy vaqtida hisob ochilmadi. Natijada kubok sohibi penaltilar seriyasida aniqlandi. Omad lotoreyasida “Odil juniors” jamoasi mezbonlarni 5-2 hisobida mag'lub etgan holda bosh sovrinni qo'lga kiritdi. “Bunyodkor” yoshlarini 2-1 hisobida mag'lub etgan yosh “paxtakor”chilar 3-o'ringa sazovor bo'ldi. Musobaqa yakunida g'olib va sovrindorlar, shuningdek, turli nominatsiyalar bo'yicha eng yaxshi, deb topilgan yosh futbolchilar kubok, diplom va esdalik sovg'alari bilan taqdirlandi.
Fikr bildirish
Hali hech kim izoh qoldirmagan. Birinchi bo`lib izoh qoldiring :)!!
Fikr qoldirish uchun Ro`yxatdan o`tish lozim!!!