Xushxabar: O'zbekiston 2025 yilgi yoshlar o'rtasida Osiyo o'yinlariga mezbonlik qiladi
/ Kiritdi: BestMaster Ko'rilgan: 218
2020 yil 7 avgustda O'zbekiston Respublikasi Vazirlar Mahkamasining “2025 yilda O'zbekistonda yoshlar o'rtasidagi IV yozgi Osiyo o'yinlarini o'tkazishga tayyorgarlik ko'rish chora-tadbirlari to'g'risida”gi Qarori qabul qilindi.
Ma'lumki, Osiyo Olimpiya kengashining 2019 yil 28 sentyabr kuni Qatarning Doxa shahrida bo'lib o'tgan 73-Ijroqo'mi yig'ilishida Toshkent shahrida 2025 yil yoshlar o'rtasida IV yozgi Osiyo o'yinlarini o'tkazishga rozilik bildirish to'g'risida qaror qabul qilingandi.
Qarorga muvofiq, mazkur nufuzli musobaqani yuqori saviyada o'tkazish maqsadida O'zbekiston Milliy Olimpiya qo'mitasi huzurida “Toshkent–2025” yozgi Osiyo o'yinlarini o'tkazishni tashkil etish bo'yicha tashkiliy qo'mita tarkibi hamda chora-tadbirlar dasturi tasdiqlandi.
Shuningdek, ilg'or davlatlar tajribasidan kelib chiqib, Osiyo o'yinlarini yuqori saviyada tashkil etish va o'tkazish bilan bog'liq vazifalarni tizimli amalga oshirish maqsadida davlat muassasasi shaklidagi “Toshkent–2025” yozgi Osiyo o'yinlarini o'tkazish direktsiyasi tuziladi.
Direktsiya zimmasiga O'zbekistonda Osiyo o'yinlarini o'tkazish bo'yicha Osiyo Olimpiya kengashi bilan O'zbekiston Respublikasi Hukumati o'rtasida shartnomalar, kelishuvlar, memorandumlar va kafolat xatlarini imzolash tadbirlarini tashkil etish, Osiyo Olimpiya kengashi va sport turlari bo'yicha Osiyo sport federatsiyalari (uyushmalari) bilan o'zaro hamkorlik qilish, yoshlar o'rtasida IV yozgi Osiyo o'yinlariga tayyorgarlikning bosh rejasini tuzish, Osiyo o'yinlari dasturini hamda milliy qadriyatlarimizdan kelib chiqib, Toshkent–2025 Osiyo o'yinlarining logotipini ishlab chiqish, musobaqani yuqori saviyada tashkil etish va o'tkazish bo'yicha xalqaro va respublika miqyosidagi tadbirlar hamda uning doirasida ko'rgazmalar, konferentsiyalar, ilmiy-amaliy anjumanlar va boshqa tadbirlarini o'tkazish, mavjud infratuzilmalar quvvatini tahlil qilish asosida Osiyo o'yinlari o'tkaziladigan sport inshootlari va boshqa ob'ektlarni Osiyo Olimpiya kengashi va xalqaro sport federatsiyalari talablariga muvofiq tayyorlash, zarur bo'ladigan sport, tibbiy, texnik va boshqa jihozlar bilan ta'minlash, televizion ko'rsatuvlarni taqdim etish va texnik tayyorgarlik, efirga uzatish huquqlari himoyasi, o'yinlar, uning tantanali ochilish hamda yopilish marosimlariga tayyorgarlik ko'rish, Osiyo o'yinlari g'oyalari va qadriyatlarini targ'ib etishga qaratilgan reklama tadbirlarini o'tkazish, axborot bilan ta'minlash, marketing dasturlarini amalga oshirish, Osiyo o'yinlariga homiylarni jalb qilish, tayyorgarlik ishlarining borishi to'g'risida OAV orqali, shu jumladan Internet jahon axborot tarmog'ida keng yoritilishini tashkil etish kabi vazifalar yuklatilgan.
Jismoniy tarbiya va sport vazirligi
Matbuot xizmati
Bosh sahifaga
219