«Bunyodkor»ning asosiy va o'rinbosarlar tarkibi o'rtoqlik uchrashuvida maydonga tushdi

Superliga va Yoshlar ligasiga tayyorgarlik ko'rayotgan «Bunyodkor»ning asosiy va o'rinbosarlar tarkibi bugun nazorat uchrashuvlarida maydonga tushdi.

Vadim Abramov boshchiligidagi asosiy tarkib «Bunyodkor» stadionida Pro liga vakili «Oq-tepa» bilan kuch sinashgan bo'lsa, Viktor Karpenko murabbiyligidagi o'rinbosarlarimiz «Rubin»ga qarshi maydonga chiqdi.

Bir vaqtda o'tkazilgan uchrashuvlarning birinchi bo'limida darvozalar bir martadan ishg'ol qilindi. «Bunyodkor» stadionidagi bahsda Humoyun Murtazoevning goli evaziga Abramov shogirdlari tanaffusga g'olib sifatida yo'l olgan bo'lsa, akademiyamiz maydonidagi bellashuvning birinchi bo'limida Malikshoh Rasulov hisobni ochdi. O'yinlarning ikkinchi bo'limi bir-biridan tubdan farq qildi. Vadim Abramov tanaffusda tarkibda bir qator o'zgarishlarni amalga oshirdi. Bu o'z-o'zidan natijaga ta'sir qildi va «Oq-tepa» g'alaba qozondi. Aksincha, o'rinbosarlarimiz ikkinchi bo'limda «Rubin» darvozasini oz emas, ko'p emas naqd olti (!) bor ishg'ol qilib, hisobni 7:0 aylantirishdi. 

O'RTOQLIK UChRAShUVLARI
«Bunyodkor» - «Oq-tepa» - 1:2 (1:0)
Gollar: Humoyun Murtazoev – Sherzod Qodirov, Mirjalol Miryusupov.

«Bunyodkor» - «Rubin» - 7:0 (1:0)
Gollar: Bo'ronbek Mirzasalimov (3ta), Malikshoh Rasulov, Aram Markaryan, Umid Sultonov, Otabek Jo'raqo'ziev.