Shahram G'iyosov Olimpiada chempioni Daniyar Eleusinov hamda o'zbekistonlik bokschi Saidjamshid Ja'farov jangi borasida fikr bildirdi

Bokschi Shahram G'iyosov “Daryo” bilan suhbatda Saidjamshid Ja'farov hamda qozog'istonlik Daniyar Eleusinov qarama-qarshiligi borasida o'z fikrlarini bildirib o'tdi.

“Juda zo'r jang bo'ladi. Professional ringda qozog'istonlik bokschining tajribasi kattaroq. Lekin havaskor boksda, hozirda yaxshi ketayotgan bokschi bu Saidjamshid. Shuningdek, u hali yosh. Saidjamshidning shiddati bor, chempionni mag'lub etsam degan ishtiyoq bilan ringga chiqadi. Ikkalasida ham ustunlik bor.

Men yaxshi jang tarafdoriman. Lekin baribir o'zimning ukam, Saidjamshidga muxlislik qilaman. U bilan Buxoroda bitta zalda mashg'ulotlar o'taganmiz. Omad tilayman, albatta”, — deydi Shahram.

Eslatib o'tamiz, 27 aprel kuni Qozog'istonning Olmaota shahrida “IBA Chempionlar oqshomi” bo'lib o'tadi. Unda Rio—2016 Olimpiadasi chempioni Daniyar Eleusinov hamda jahon vitse-chempioni Saidjamshid Ja'farov jang qiladi. Ushbu jang g'olibi -71 kg vazn toifasida IBA chempionlik kamariga rasmiy da'vogarga aylanadi.

Eleusinov Rio-2016 Olimpiadasi chempioni bo'lib, o'shanda final jangida o'zbekistonlik Shahram G'iyosovni hakamlarning bahsli qarori bilan mag'lubiyatga uchratgan edi.

Eslatib o'tamiz, Doniyor Eleusinov 2021 yilning dekabr oyida argentinalik Xuan Ernan Lealni mag'lub etganidan buyon jang o'tkazmagan.

O'zbekistonlik Saidjamshid Ja'farov havaskorlar toifasida ishtirok etadi. U o'tgan yili Toshkentda o'tkazilgan jahon chempionatida kumush medalni qo'lga kiritgan. Bundan tashqari bokschi ikki karra Osiyo chempioni bo'lgan.

Suhbat 20 aprel sanasida yozib olingan. 22 aprel kuni Qozog'iston OAV ushbu jang bekor qilingani haqida xabar berdi. Manbaga ko'ra, qozog'istonlik bokschi jarohat olganligi bois jangda ishtirok etmaydi.