"Real" yanvarda Alaba o'rniga himoyachi ijaraga olmoqchi edi

Madridning “Real” klubi “Union” himoyachisi Diogu Leyteni o'z safiga qo'shib olishni rejalashtirgandi.

AS xabariga ko'ra, dekabr oyi oxirida David Alaba tizzasidan olgan jiddiy jarohati fonida himoya chizig'ini zudlik bilan kuchaytirish variantlari orasida Leyteni mavsum oxirigacha ijaraga olish ko'rib chiqilgan.

Qayd etilishicha, “Real” bosh murabbiyi Karlo Anchelotti 25 yoshli portugaliyalikning o'yinidan hayratda qolgan, biroq yakunda madridliklar qishki transferlardan voz kechishga qaror qilgan.

O'z navbatida Leytening o'zi ham mavsum o'rtalarida "Union"ni tark etishni rejalashtirmagandi, chunki u mavsum boshida jamoadagi qiyin vaziyatni to'g'irlab, Portugaliya terma jamoasiga Evro-2024'da yordam bermoqchi edi.