Tata Steel Chess 2024. Nodirbek Abdusattorov tay-brekda yaqqol g'alabani qo'ldan chiqardi

Niderlandiyaning Veyk an-Zee shahrida shaxmat bo'yicha Tata Steel Chess 2024 turnirida g'oliblarni aniqlash maqsadida 4 sportchi o'rtasida tay-brek bahslari o'tkazildi.

Yarim finalda Nodirbek Abdusattorov - Vey Yi (Xitoy), Domaradju Gukesh (Hindiston) - Anish Giri (Niderlandiya) juftliklari to'qnash kelishdi. Blits formatida tomonlar ikkitadan o'yin o'tkazishdi.

Abdusattorov dastlab qora donalarda o'ynab, g'alabaga juda va juda yaqin keldi. Ammo o'yin so'ngida birgina noaniq yurish tufayli Vey Yi doimiy shoh berish imkoniyatini qo'lga kiritdi va bahs durang bilan tugadi.

Nodirbek oq donalarda ham ustunlikka ega bo'ldi. Biroq tseytnotdagi noaniq yurish tufayli hamyurtimiz mag'lubiyatga uchradi — 0,5 - 1,5.

Ikkinchi yarim finalda esa Gukesh Girini mag'lub etib, finalga chiqdi. Shu tariqa, o'tgan yilgi musobaqada 1 va 2-o'rinni egallagan shaxmatchilar bu safar 3-o'rin bilan cheklanishdi.

Vey Yi va Domaradju Gukesh o'rtasidagi final jangida bahsida xitoylik shaxmatchi g'alaba qozondi (1,5 - 0,5) va musobaqa g'olibiga aylandi.