Tata Steel Chess 2024. Nodirbek Abdusattorov muhim o'yinda mag'lubiyatga uchradi (videosharh)

Niderlandiyaning Veyk an-Zee shahrida shaxmat bo'yicha Tata Steel Chess 2024 turnirida kecha 12-tur bahslari o'tkazildi.

Turnirning Masters guruhida ishtirok etayotgan o'zbekistonlik grossmeyster Nodirbek Abdusattorov bu turda hindistonlik Vidit Santosh Gujrathiga qarshi qora donalarda o'ynadi.

Mazkur bahsda hamyurtimizni durang natija ham qanoatlantirardi. Ammo Nodirbek o'yin boshidanoq g'alaba uchun harakat qildi hamda 11-yurishda tavakkal qilib Filni oldinga surdi (c4 xonasiga). Kompyuter mazkur yurishni noaniq yurish sifatida baholadi va Vidit kichik ustunlikni qo'lga kiritdi.

Hindistonlik shaxmatchi ketma-ket aniq yurishlar orqali o'yin oxirigacha mazkur ustunlikni saqlab qoldi. Endshpilda Gujrathi bir Piyoda ustunligiga ega bo'ldi. Buning oqibatida Nodirbek 75-yurishga kelib mag'lubiyatni tan oldi.

12-turdan keyin birdaniga 5 nafar shaxmatchida 7,5 ochko mavjud. Abdusattorov qo'shimcha ko'rsatkich bo'yicha 4-o'ringa tushib qoldi. Vatandoshimiz bugun so'nggi turda germaniyalik Aleksandr Donchenkoga qarshi oq donalarda o'ynaydi. O'yinlar Toshkent vaqti bilan 16:15da boshlanadi.

Manba: stadion.uz