Champions Chess Tour. Nodirbek Abdusattorov Nakamurani mag'lub etib, yarim finalga chiqdi

Kanadaning Toronto shahrida shaxmat bo'yicha Champions Chess Tour—2023 turniri bo'lib o'tmoqda. Bahslar rapid yo'nalishida o'tkazilmoqda (har bir sportchiga 15 daqiqadan vaqt va har bir yurishga qo'shimcha 3 soniya qo'shib berilmoqda).

Umumiy mukofot jamg'armasi 500 000 dollarni tashkil etuvchi ushbu musobaqaning final bosqichida dunyoning sakkiz nafar kuchli grossmeysteri qatorida o'zbekistonlik Nodirbek Abdusattorov ham ishtirok etayotganidan xabaringiz bor.

Kechagi dastur davraviy bahslardagi so'nggi 7-tur o'yinlari bilan boshlandi. Nodirbek frantsiyalik Maksim Vasher-Lagravga qarshi dona suradi. Dastlabki ikki o'yinda hamyurtimiz ustun vaziyatga ega bo'ldi, ammo yakunda durang qayd etildi. G'olibni aniqlash uchun esa "armageddon" partiya o'ynaldi. Vatandoshimiz qora donalarda o'ynashiga qaramay (durang ham etarli bo'lardi), 28-yurishga kelib raqibni taslim etdi. Natijada Abdusattorov 4 ochko bilan davraviy bahslarni 4-o'rinda yakunladi.

Davraviy bahslar yakunida 7 va 8-o'rinni egallagan Alirizo Firuja va Denis Lazavik turnirni tark etgan bo'lsa, yuqori ikki pog'onani band etgan Uesli So va Magnus Karlsen bevosita yarim finalga yo'l oldi.

3-6-pog'onalarni egallagan shaxmatchilar esa o'zaro pley-off formatida yarim final yo'llanmasi uchun kurash olib borishdi. Nodirbek dastlab Fabiano Karuanaga qarshi bahslarda ishtirok etdi. Birinchi partiyada AQShlik sportchi g'alaba qozongan bo'lsa, hamyurtimiz oq donalarda g'alaba qozonib, umumiy hisobni tenglashtirdi. "Armageddon" partiyada esa raqibning qo'li baland keldi.

Karuana yarim finalga chiqqan bo'lsa, Abdusattorov musobaqada ishtirokini davom ettirish uchun Xikaru Nakamuraga qarshi jang qildi. Dastlabki ikki partiyada tomonlar durangga imzo chekishdi. "Armageddon" bahsida esa hamyurtimiz qora donalarda harakat qildi. Unda qayd etilgan durang esa o'zbek shaxmatchisini yarim finalga olib chiqdi.

Nodirbek Abdusattorov yarim finalda AQShlik So Uesliga qarshi dona suradi. Ikkinchi yarim final esa Magnus Karlsen va Fabiano Karuana o'rtasida kechadi. G'olib shaxmatchilar finalda o'zaro to'qnash kelishadi.