Ronaldu «Atalanta»ga qarshi o'yinda boshlang'ich tarkibda maydonga tushmaydi

"Yuventus" bosh murabbiyi Massimiliano Allegrining aytishicha, hujumchi Krishtianu Ronaldu Italiya chempionatining 18-turi doirasida bo'ladigan "Atalanta"ga qarshi o'yinda zaxirada qoladi.

"Krishtianu Ronaldu ertaga o'yinni zaxira o'rindig'ida boshlaydi. Hech bo'lmasa bir marta futbolni birga ko'ramiz. Uning o'yinidan qoniqish hosil qilyapman. Agar statistikaga qaraydigan bo'lsak, ushbu mavsumda u o'zining eng yaxshi startini ko'rsatdi.

Evropa chempionlar ligasining pley-off bosqichi bo'lib o'tadigan mart oyiga kelib uning yuqori formada bo'lishi biz uchun muhim. Albatta, jamoa sifatida biz kuchlimiz. Ammo Ronaldu bilan "Yuventus" o'tgan mavsumga nisbatan kuchliroq", – dedi Allegri.

Ushbu mavsumda Ronaldu "Yuventus" safida barcha musobaqalar doirasida 22ta o'yinda maydonga tushib, 12ta gol urdi va 7ta golga uzatma berdi.